Te Rūnanga Nui o Ngā Kura Kaupapa Māori o Aotearoa

I tū te hui tuatahi i Okoroire i te Hakihea, 1988. Ko te whakawhāriki i ngā mahi, ko te toha i ngā wāhanga hei aro mā tērā, mā tērā. I tū te hui tuarua a te Ohu i te kāinga o Katerina Mataira i Whāingaroa. Ka nui te wānanga e pā ana ki ngā tūāhuatanga i whakaae ngātahi ai te katoa o te Ohu.

Ka hiki te hui i tētehi pō, ā, ao ake, ka mea mai a Katerina i tau ki a ia he kōrero i tukuna e te hunga wairua, ka whakamārama mai a ia i Te Aho Matua. I āta whiriwhirihia e te Ohu ngā kōrero a Katerina, ā, ka whakaaetia katoatia kia noho ko Te Aho Matua te tauakī whakataki i te pūrongo a te Ohu, mā te Te Aho Matua e tautuhi ngā āhuatanga o te kura kaupapa Māori.

Mihimihi

E tukuna ana ngā tangi maioha ki te hunga kua riro atu ki tua, i whakapeto ngoi ki te whakawhanake i te Kura Kaupapa Māori.

Moe mai rā: Tuki Nepe koutou ko Rangi Murray, ko Wati Epiha, ko Te Hiko o te Rangi Hohepa, ko Mate-ki-te-uru Gardiner, ko Eru Potaka-Dewes, ko Te Rore Neho, me te tokomaha atu nō ngā whānau katoa o ngā Kura Kaupapa, huri noa i te motu.

Nā koutou te pou kuia o te Kura Kaupapa Māori, a Te Heikoko Katerina Mataira i pōhiri kia tau a ia i waenga i a koutou, te kāhui wairua, i roto i ngā tau.

Te Aho Matua o Ngā Kura Kaupapa Māori

Te Ira Tangata

He kākano i ruia mai i Rangiātea, e kore ia e ngaro

Te Reo

Tōku reo, tōku ohooho. Tōku reo, tōku māpihi maurea. Tōku reo, tōku whakakai marihi

Ngā Iwi

Te piko o te mahuri, tērā te tupu o te rākau

Te Ao

Ka pū te ruha, ka hao te rangatahi

Āhuatanga Ako

Tamariki wāwāhi tahā, aratakina ki te mātāpuna o te mōhio, o te ora, o te maungarongo

Te Tino Uaratanga

Kia tū pakari, kia tū rangatira ia hei raukura mō tōna iwi

Pānui o te Wā

Te Aho Tāngaengae

Nā ngā tauira Wharekura Aho Matua

24 Mei 2021

“Ko te noho tahi me te waiata tahi i te taha o ngā hoa o Te Aho Matua te tino painga o tēnei kaupapa.”

Koinei tā Hineteahurangi Durie Ngata, tauira Tau 13 ki Te Kura Kaupapa Māori o Mana Tamariki, Papaioea.Hei tā Durie Ngata, kaiwaiata takitahi i te hopunga, nō rātou katoa ngā rangatahi te māngari nui i wheakohia tēnei āhuatanga o te tito me te hopu waiata.

Ko te wā tuatahi tēnei kua whakakotahi mai ngā wharekura Aho Matua ki te whakaoti i tētahi hopunga puoro.Nō te marama o Maehe i tēnei tau ka tū Te Huinga Reo o ngā wharekura Aho Matua ki Te Kura Kaupapa Māori o Te Kura Whakapūmau i te Reo Tūturu ki Ōtautahi.He kura reo mō ngā tauira Tau 12-13.

E ai ki a Tahu Paki, Tumuaki Tuarua o Te Kura Whakapūmau, “Me kore ake te momo o te kaiako pērā me Pere Wihongi.Nā rātou ko tētahi kāhui raukura e whakaako ana ki ngā wharekura o te motu ngā tauira i tautoko kia oti pai ai te waiata.”

No muri i Te Huinga Reo ka puta te whakaaro kia hopungia te waiata ki tētahi taiwhanga hopu puoro.

“I tere whakaae Te Rūnanga Nui o ngā Kura Kaupapa Māori ki te tautoko i te hopunga kia rongo ai ngā tamariki ki tētahi wheako mīharo i hua mai ai i tā rātou whakapau kaha,” te kōrero a Hohepa Campbell, Kaitakawaenga o te Rūnanga.

Nā reira, i te marama o Aperira i hopu i te waiata ki te whare hopu puoro o Matrix ki Te Whanganui-a-Tara.I a rātou i reira ka whakaahua i a rātou e waiata ana kia puta he kiriata puoro hoki.

Ko Te Aho Tāngaengae he waiata whakatairanga i Te Aho Matua, he whakapuakitanga aroha nā ngā tauira wharekura.

“Kua tino ora, kua tino oho hoki te ngākau me te wairua i te toha i ngā kupu me ngā mātāpono o Te Aho Matua ki te ao,” hei tā Hapai Te Rangi Cameron, tētahi atu o ngā kaiwaiata takitahi, tauira Tau 13 ki Te Kura Kaupapa Māori o Ruamata ki Rotorua.

Ka whakaterea Te Aho Tāngaengae i tēnei tau.Tāria ngā taipitopito mō te putanga o tēnei tino waiata!

– KUA MUTU –

Mō ētahi atu kōrero whakapā ki a Brenda Soutarbrenda@nullrunanga.co.nz027 2568366

Te Rūnanga Nui o ngā Kura Kaupapa Māori o Aotearoa

Te Rūnanganui

Te Aho Matua

Te Marautanga

Maramataka