Tautāwhi Tamariki
Pānui Tōiri 23 – 27 Noema 2023
Ko wai ngā tino kaiako rānei ngā kaimahi rānei kei a rātou te haepapa ki te ārahi i ngā kaiako me ngā tamariki whakaraerae?
He hiahia nui tō te Te Rūnanga Nui ki te whakapā atu ki ngā tino pouako rānei ngā tino kaimahi rānei o ia kura e ārahi ana, e āwhina ana i ngā kaiako ki te tiaki i ngā tamariki whakaraerae.
I te wā ka whakarite pānui Te Rūnanga Nui mō te rautaki Tautāwhi Tamariki ka whakapā atu ki aua kaimahi me te Tumuaki o ia kura. Tēnā whakakīia te patapātai nei. E 2 meneti anake te roa hei whakakī i te patapatai.
https://forms.office.com/r/CAMFAz2RtN
He pūtea tautoko anō ka tukuna hei tiaki i ngā tamariki tautāwhi – $4,648.44
Kua whakawhiwhia e Te Rūnanga Nui he pūtea motuhake anō hei tautoko i ngā tamariki whakaraerae. Ko te tikanga, he pūtea tautoko tēnei hei utu i ngā nama kia haere atu te tamaiti ki tētahi mātanga whakamārie hinengaro kia tūwheratia ai tōna ngākau ki te koa me te aroha. Heoi anō, kei te whānau anō te mana me pēhea te whakapau i te pūtea tautoko nei hei tiaki ngā tamariki whakaraerae, i te mea mō te nuinga o ngā kura kāore i ā rātou he ratonga mātanga whakamārie hinengaro (Counselling services) reo Māori, whakaaro Māori ki tō rātou rohe, he tino pākehā te momo ratona kei tō rātou rohe rānei kei tō rātou tāone rānei.
E $4,648.44 (excl. GST) te nuinga o te pūtea ka whakawhiahia ki ia kura, ahakoa te rahi o ngā tamariki, he kura teina rānei, he kura tuatahi rānei, he kura arongotahi rānei. Hei whakawhiwhi i te te pūtea nei me tono nama tāke hokohoko (GST invoice) ia kura ki a Whaea Trish. trish@nullrunanga.co.nz
He rau paetukutuku mō Te Rautaki Tautāwhi Tamariki
Ki te hiahia koe ki te whai i ngā kōrero mō ngā take e pā ana ki te kaupapa Tautāwhi Tamariki, tēna, pānuitia ngā kōrero ōmua ki kōnei.
https://runanga.co.nz/tautawhi-tamariki/
Pānui Tōiri 22 – 14 Noema 2023
I te hui ā-tau i Whangaroa i te tīmatanga o te tau, i whakahaeretia tētahi papamahi mō te kaupapa Tautāwhi Tamariki. I runga anō i ngā tohe me ngā wero a Te Rūnanga Nui ki te Tāhuhu me te Kāwanatanga i ngā tau kua taha ake nei kua whakatapua e Te Tāhuhu he pūtea motuhake mō ā tātou tamariki whakaraerae, nā reira e aro nui ana Te Rūnanga Nui ki te waihanga i tētahi rautaki, ā-motu, ā-rohe hei tautoko i ngā tamariki he nui ō rātou matea hei ngā marama e tū mai nei.
He aha te Rautaki Tautāwhi Tamariki?
Ko te Tautāwhi Tamariki tētahi kīanga kōrero kua tapaina e Te Rūnanga Whāiti mō ngā tamariki he nui ō rātou matea ako. He tamariki nō tua whakarere te ingoa kua tapaina e ētahi kura mō ēnei tamariki. Tērā pea he tamaiti taringa mārō, he tamaiti kapo te tamaiti. Tērā pea he tamaiti kaha pōuri, he tamaiti aroteretini (ADHD) aha rānei te āhua o te tamaiti. Ko “Learning Support” te ingoa o te rautaki hei āwhina i ngā tamariki he nui ō rātou matea ako i roto i ngā kura auraki.
Ko tētahi whāinga tiketike i roto i tā tātou mahere rautaki,
“Kikī ana ngā kura i ngā tamariki hari koa.”
Ko te rautaki Tautāwhi Tamariki Te Aho Matua he kaupapa whāroa hei āwhina i ngā kura ki te whai i ō rātou hiahia motuhake ki te tiaki i ngā tamariki tautāwhi. He māhere anga whakamua te rautaki Tautāwhi Tamariki a Te Rūnanga Nui kia pai ai te mahi tahi a tēnā kura me tēnā kura, te mahi tahi rānei a ngā kura rānei a tēnā rohe me tēnā rohe. Ko te rautaki Tautāwhi Tamariki he kaupapa hei hiki i te tuakiri o te tamaiti kia mauri ora tōnā āhua.
He aha te mahi hei ngā marama mea ake nei?
Hei ngā wiki e whā e tū mai nei kei te tuhi te kaitakawaenga he kōrero poto i roto i a Tōiri, ā, ā tōna wā ka tukuna he karere patapātai ki ia kura.
Hei te tīmata ā tērā tau ka tū ētahi hui ki te matapaki i ngā hiahia o ngā kura. Me rite ngā kura ki te hui tahi ā tērā tau. Kia kaha, kia manawanui tātou.