He Pānui ki ngā whānau 7 o Paenga-whāwhā

E ngā whānau Kura Kaupapa Māori Aho Matua, tēna koutou katoa.

E ngā Tumuaki KKM Aho Matua, tēnā koutou katoa.

Tangihia te hunga wairua kua huri ki tua o te ārai, kua tangata Hawaikitia. Haere koutou, e moe i te moenga roa. Kauria ngā moana ki te wā kāinga o ō tātou mātua tūpuna, ki tawhiti nui. Āpiti hono, tātai hono, ko koutou ki a koutou. Āpiti hono tātai hono, tātou te hunga, tēnā tātou katoa. E āku rangatira, tēnei te mihi maioha ki a koutou katoa.

Hui Humi (ZOOM meeting) mā ngā Tumuaki KKM TAM

Kia puawai tōna waiora me tōna hauora i roto i
te hono tāngaengae o tōna wairua me tōna tinana

He mea pārekareka te rongo i ngā kōrero mō te mahi nui e hāpaitia ana e tēnā kura, e tēnā kura. He maha hoki ngā rautaki hīkaka e haere ake ana i tēnei wā o te noho herehere ki te kāinga. Heoi anō, i ngā rangi kua taha ake nei, kua tono ētahi Tumuaki i te āwhina a TRN ki te whakahaere i ngā akoranga matihiko mō ā rātou tamariki wharekura. Ā te Taite nei, te 9 o ngā rā o Paenga-whāwhā, ā te 2 karaka ki te 3 karaka i te ahiahi ka tū tētahi hui Tūmuaki mō ērā o ngā kura kei te hiahia āwhina.

Kei te hiahia āwhina tō kura?

Ka taea e tō kura te āwhina ētahi atu kura e rapu āwhina ana?

He kōrero tautoko āu hei āwhina i ētahi atu whānau?

Ki te wātea koe ki te tūhono, panaia te hono e whai ake nei ā te wā o te hui. Ka 1 hāora noa iho te roa o te hui. Ki te hiahia anō tātou ki te whakahaere i tētahi atu hui humi, ā-rohe rānei, ā-kāhui rānei, ka taea e te kaimahi o tō rohe te whakarite. Ki te wareware koe i te hono ipurangi, haere ki te whārangi ipurangi a TRN www.runanga.co.nz , kei reira te hono hui humi e whai ake nei.

He take anō tāu hei matapaki? Tēna tukua te ngako o tāu kōrero ki a Whaea Trish, tari@nullrunanga.co.nz Māna tētahi kōrero whakaraupapa e whakarite mā tā tātou hui.

Kia tau te ihirangaranga aroha o Rongo huri noa i tō kāinga mirurmiru me tō whānau.

Aroha nui, nā

Hohepa Campbell
Kaitakawaenga/ Chief Executive
kaitakawaenga@nullrunanga.co.nz